O CPETIG e FEUGA organizan un curso de Scrum manager
xoves, 13 de marzo do 2014
O
Colexio Profesional de Enxeñaría Técnica en Informática de
Galicia (CPETIG) quere impulsar na nosa terra, a nivel das
administracións pero tamén das empresas, novas metodoloxías que
contribúan a axilizar procesos. En definitiva, a reducir o tempo e o
esforzo no desenvolvemento de proxectos ao tempo que se maximiza a
eficacia, a calidade e a rendibilidade. Para ir preparando este
terreo, o
CPETIG vén de convocar xunto con FEUGA un curso de Scrum
manager
para profesionais do sector informático con certificación oficial.
Lembrar que Scrum
manager
é “un procedemento de xestión que permite obter o
mellor resultado posíbel dos nosos proxectos tras estudar o xeito de
traballar de equipos altamente produtivos”, explica o Colexio, que
tamén recorda que “en moitos concursos públicos xa esixen que os
proxectos presentados conten con profesionais certificados en Scrum
para a súa execución”.
O curso en cuestión está dirixido a profesionais
do sector informático con experiencia previa na realización de
iniciativas nos ámbitos de análise, desenvolvemento ou dirección
de proxectos. A actividade formativa, que se realizará os días 2 e
3 de abril, ten unha duración de 16 horas e será impartida polo
enxeñeiro técnico informático Raúl Herranz, con máis de 15 anos
de experiencia en desenvolvemento de software. Os asistentes que
superen o exame obterán o certificado oficial Certified Scrum
Manager.
Como dixemos, a formación está dirixida a
profesionais que participen na realización de proxectos, “con
independencia do papel que desempeñen nestes (xefes de proxectos,
analistas, deseñadores, programadores e usuarios)”, explica o
Colexio. Os obxectivos do curso son amosar a través da práctica
como traballar co Scrum e como adaptar os procesos actuais
“para lograr unha implantación realista e eficaz desta metodoloxía
e das técnicas áxiles na súa organización”. A plataforma
profesional que preside Marcos Mata salienta tamén que o modelo
pedagóxico que vai asumir o obradoiro en cuestión é “totalmente
dinámico e interactivo, baseado na práctica”.
A formación ten un custo de 495 euros, aínda que
os colexiados do CPETIG e os socios de FEUGA terán un desconto do
10%. No prezo inclúese a documentación e a certificación. As
empresas tamén dispoñen dun plan de descontos a partir da terceira
inscrición.
A organización desta actividade formativa enmárcase
nos compromisos adquiridos pola nova xunta directiva do CPETIG,
elixida o pasado 1 de febreiro, para impulsar a formación permanente
dos colexiados, “unha estratexia necesaria para mellorar
constantemente o servizo que os enxeñeiros técnicos informáticos
prestan á sociedade”.
O curso inclúe os seguintes contidos:
- Material de alumno: Libro de apuntamentos, fichas
de actividades e exercicios, baralla para estimación de póker.
- Curso presencial de 16 horas, incluídos talleres
e actividades:
· Obradoiro de simulación de xestión de proxectos
con potencial de predición. Actividades: análise, descomposición e
estimación, planificación e seguimento.
· Obradoiro de xestión de proxectos áxil con
Scrum: product Backlog, sprint Backlog, reunión de inicio de
sprint, reunión diaria, reunión de peche de sprint.
· Exercicio de estimación de póker.
· Exercicios de xestión do coñecemento,
explicitación e socialización.
- Probas e certificación oficial
Scrum Manager (certificación de 150 Puntos de autoridade
Scrum Manager).