O Campus de Ferrol participa nun proxecto europeo para producir materiais maker contra o cambio climático

Loitar contra o cambio climático é tarefa de todas as persoas, un bo xeito de facelo é producir materiais e/ou recursos educativos seguindo o espírito do movemento Maker (o movemento argalleiro e participativo que defende a idea do usuario creador de tecnoloxía). Este é o principal obxectivo do Proxecto Europeo Erasmus+ Production of Prototypes with STEAM Content in Maker Workshops Against Climate Change, o proxecto Eco-Maker, que lidera, en representación da Universidade da Coruña (UDC), a profesora da Escola Politécnica de Enxeñaría de Ferrol (EPEF), Elena Arce Fariña.
Indo ao proxecto Eco-Maker, dicir que nace coa vontade de xerar un sistema educativo híbrido que combina o movemento maker, a formación en materias STEAM (siglas de Ciencia, Tecnoloxía, Enxeñaría, Arte e Matemática) e a posta en marcha de plans de estudo e método educativos ecolóxicos. Así, o alumnado participante nesta iniciativa de innovación docente, con idades comprendidas entre os 10 e os 14 anos, producirá prototipos como turbinas eólicas ou pequenos paneis solares contra o cambio climático xunto co profesorado que imparte as materias STEAM en obradoiros maker.
Cómpre sinalar que a UDC é a responsábel da elaboración do currículo. Persoal docente vinculado á Escola Politécnica de Enxeñaría de Ferrol (EPEF) e á Escola Universitaria de Deseño Industrial (EUDI) traballa xa no deseño dun documento no que se fomente a posta en funcionamento de estratexias nacionais STEAM, apoiando o desenvolvemento de competencias en materia de educación e formación relacionadas coa sustentabilidade ou no eido da capacitación no sector ecolóxico, entre outras.
O Agrupamento de Escolas de Mangualde de Portugal coordina un proxecto de innovación docente no que participa a Academia Internacional de Ciencia e Investigación de Reino Unido, o laboratorio FabLab Messina de Italia, o Centro de Formación Profesional BURSA/OSMANGAZI-Osmangazi, dependente do Ministerio de Educación Nacional de Turquía, a Universidade da Coruña de España, o centro educativo SP 50 Bialystok de Polonia, e o Centro de Formación EduForm de Portugal.
O Proxecto Eco-Maker está co-financiado pola Comisión Europea e conta cun orzamento total de 250.000 euros. A Universidade da Coruña dispón de 39.500 euros para elaborar o currículo do curso promovendo o interese e a excelencia nas áreas de Ciencias, Tecnoloxía, Enxeñaría, Artes e Matemáticas.