Ponte Caldelas acada Internet de alta velocidade para todas as súas aldeas logo de completar o despregue en Taboadelo
venres, 17 de decembro do 2021
O
concello
de Ponte Caldelas conta xa con fibra óptica en todas as aldeas do
municipio, logo de que a empresa local de telecomunicacións
Áurea completase na
xornada deste 15 de decembro a despregadura total da súa rede de
tecnoloxía FTTH (fibra até o fogar) no lugar de Taboadelo, que viña
sendo, segundo confirmou a Deputación de Pontevedra, o único núcleo
do municipio que non dispoñía aínda deste “servizo básico do
século XXI”.
A
firma de Ponte Caldelas (Áurea) ofrece ata unha velocidade de 600
Mbps reais de suba e baixada (simétricos) e, en palabras da entidade
provincial “un servizo de gran calidade do que non dispoñen en
moitas grandes cidades”. Este servizo está implantado xa nos 33
núcleos de poboación de Ponte Caldelas, no casco urbano e tamén no
Polígono Empresarial de A Reigosa.
Como
dixemos, o caso de Taboadelo foi un último en resolverse en materia
de cobertura, un núcleo que viña sendo considerado como "zona
branca" ao ter sido obxecto dunha subvención concedida polo
Goberno de España no ano 2017 a Telefónica e que finalmente a
sociedade non chegou a executar. “Unha vez finalizado o prazo”,
explica a Deputación de Pontevedra, “e logo de que Telefónica non
executase os traballos, a empresa local Áurea comezou de seguido a
despregar fibra para dotar do servizo de alta velocidade de Internet
ós veciños de Taboadelo que xa poden solicitar a alta no servizo,
que é practicamente inmediata”.
O
Concello de Ponte Caldelas celebrou a chegada da fibra óptica a
Taboadelo, cun nivel de cobertura que equipara o municipio
pontevedrés ao nivel das grandes cidades. O alcalde Andrés Díaz
indicou que "vivir en Ponte Caldelas é un privilexio, xa que
dispoñemos de alta velocidade de Internet, excelentes comunicacións
con Pontevedra e Vigo e unha gran calidade de vida nun concello rural
que, ó mesmo tempo, é un municipio vivo, activo e dinámico ó que
cada vez chegan máis familias a vivir”.