Representantes das TIC amosan nunha xornada do CCG os camiños da literatura na docencia
xoves, 2 de xullo do 2015
O Consello
da Cultura Galega organizou hoxe unha xornada de debate sobre o papel
da literatura no ensino. O encontro, que se desenvolveu en Raxoi
(Santiago), centrou unha boa parte do seu programa en avaliar as
posibilidades da educación literaria no fomento do espírito
creativo, na capacidade de retención do coñecemento e no impulso da
vontade crítica. Amais, os relatores atinxiron os camiños
percorridos (e por percorrer) polo binomio novas
tecnoloxías-literatura. O evento, que aínda se está a desenvolver
(ten sesión de tarde), contou coa coordinación de Dolores Vilavedra
e Teresa López.
A xornada arrincou cunha ollada ao marco legal no que se move o
ensino da literatura, agora en pleno cambio tras a publicación este
luns no Diario Oficial de Galicia
(DOG) do currículo de lingua e literatura que entrará en vigor no
vindeiro mes de setembro. Ao fío disto, Noemí Álvarez Villar,
asesora de Idiomas da Consellaría de Cultura, defendeu o novo
currículo amparándose no novo marco legal. “O novo currículo
está moi baseado na lei anterior, a LOE, pero adaptado a un novo
formato que lle marca ao profesorado unha maior concreción á hora
de avaliar e ao alumnado unhas maiores competencias”.
Pola súa banda, a especialista en
didáctica da lingua e da literatura da Universidade de Santiago de
Compostela Isabel Fernández López fixo un estudo comparativo entre
as tres grandes leis educativas: a Lei Xeral de Educación de 1970, a
LOGSE de 1990 e a LOMCE de 2013, no que afecta á literatura. Nel
apuntaba que diminúe a presenza da literatura no currículo e
achegou as súas dúbidas sobre o temario no que deixan de ter
presenza os autores e as correntes.
A xornada da mañá completouse cunha
ollada empresarial e tecnolóxica. Sven Huber, co-fundador de
Boolino, portal web
especializado na comercialización de libros para público infantil e
xuvenil, deu a coñecer o seu método, que se basea en tres piares:
bos libros, un traballo de divulgación de pais e gozar da lectura.
Unha metodoloxía que colle corpo, engadiu, en recomendacións,
vídeos e experiencias lúdicas arredor dos libros. Lembrar que
Boolino é unha
start-up catalá
que naceu para aprender a ler a todos os membros da familia
e que xa contaba o ano pasado con máis de 70.000 títulos
dispoñíbeis. Foi posta en marcha por Sven Hubler e Toni Montserrat,
e consiste nunha comunidade en liña de nais e pais comprometidos co
potencial da lectura no desenvolvemento educativo da nenez. Boolino é
un servizo de balde mediante o cal unha nai ou pai accede aos libros
polos que máis poden devecer os seus pequenos, a través dun perfil
e dun recomendador. Compleméntase con Mylittlebookbox,
un modelo de subscrición para que os nenos reciban cada mes unha
caixa cun libro e con propostas de actividades sobre ese libro para
levar a cabo en familia.
Volvendo á xornada do CCG, logo da
sesión de Sven Huber, foi a quenda de Xosé Manuel Moo, coordinador
de edición educativa de Edicións Xerais de Galicia, e María Yáñez,
cofundadora da empresa A Navalla
Suíza, un dos referentes do noso tecido tecnolóxico-dixital.
A sesión da tarde está pensada para
coñecer como lle afecta a contorna dixital a este tema, coas voces
de dúas persoas especialistas na materia. Dunha banda, Laura Borrás,
profesora de Teoría da Literatura e Literatura Comparada (UB) e
directora da Institució de les Lletres Catalanes. Da outra, José
Rovira Collado, membro do Departamento de Innovación e Formación
Didáctica da Universitat d´Alacant.
Pechan a cita as experiencias de Espazo
Lectura, da man da súa presidenta, Concha Costas; da Editorial
Galaxia, con Francisco Castro; e do Centro de Formación e Recursos
de Pontevedra, con Paco Díaz, asesor de formación do ámbito
lingüístico.