Vitae e SSTQB amosan recursos para optimizarmos o desenvolvemento de programas
martes, 9 de maio do 2017
Vitae,
consultora tecnolóxica galega centrada en ofrecer aos nosos
profesionais formación avanzada sobre ferramentas e metodoloxías
dixitais, vai argallar os vindeiros días na Coruña un evento
formativo de balde sobre calidade de software. A cita será o 24 e o
25 de maio, e conta na organización co Comité Español de Empresas
de Probas de Software (SSTQB).
Segundo explica Vitae, as
sesións vainos fornecer de conferencias de provedores de formación
e de membros do devandito comité, todos eles certificadores do ISTQB
(International Software
Testing Qualification Board),
que é a entidade internacional representada no ámbito español polo
SSTQB. A cita na Coruña (no Hotel Meliá María Pita) é a
segunda etapa da xira estatal do Comité programada para este ano
2017. O SSTQB, para quen queira máis información, habilitou
na súa web un apartado con todos os datos sobre estas importantes
xornadas de traballo, incluída a axenda de actividades.
Polo que se refire ás accións concretas de cada
xornada, o día 24 levarase a cabo unha sesión preparatoria para o
exame de Probador Certificado – Nivel Básico do ISTQB. Ao rematar
a sesión, celebrase unha proba en formato en liña a cargo de iSQI,
o provedor de exames da entidade SSTQB. A asistencia á sesión
preparatoria é libre e gratuíta. Segundo informa Vitae, o exame
non é obrigatorio e ten un prezo de 150 euros, IVE non incluído.
Durante a mañá do día 25 iranse desenvolvendo
os relatorios a cargo de provedores de formación, membros, membros
de soporte e convidados do SSTQB. O rexistro, novamente, é de balde
e libre.
Na tarde da segunda xornada de actividades
realizaranse obradoiros da man (unha vez máis) de provedores de
formación, membros, membros de soporte e convidados do SSTQB.
O obxectivo deste encontro é presentar ante o
noso tecido empresarial o profesional o Comité Español de Empresas
de Probas Software e á súa comunidade, expoñer a importancia do
proceso de proba no ámbito do ciclo de vida de desenvolvemento dun
produto software, en palabras de Vitae “cun marcado carácter
práctico”, e dar a coñecer as iniciativas coas que se busca
consolidar o SSTQB como un centro de colaboración entre empresas e
institucións.
Horarios
As conferencias e relatorios, como dixemos, están
previstas para o 25 de maio. A hora de inicio de rexistro é ás 8.30
horas, estando previsto para as 9.00 o inicio das actividades. Por
certo que a partir das 14.15 e até as 15.30 horas farase unha pausa
para celebrar un cocktail cos participantes no evento. Polo
que se refire aos obradoiros (talleres), darán comezo ás 15.30
horas e cunha extensión que dependerá das actividades prácticas e
do desenvolvemento de cada obradoiro.