O uso de datos móbiles en Galicia no mes de agosto reflicte a volta á normalidade

O tráfico rexistrado na rede móbil de Movistar en Galicia incrementouse un 22% en agosto respecto ao mesmo mes de 2021, crecemento que superaría o 116% se tomamos como referencia o mes de agosto de 2019, o que podemos interpretar como unha medida da recuperación do turismo e a volta á normalidade nos desprazamentos vacacionais da poboación.
Nos últimos anos, multiplicouse o tráfico de datos na rede móbil debido ao uso cada vez máis intensivo de smartphones e tabletas entre os clientes de Movistar facilitado, en boa medida, polas tarifas con datos ilimitados. Este feito provocou unha actualización continua das capacidades da rede móbil por parte da compañía e, sobre todo, en datas estivais nas que o tráfico se multiplica desde os dispositivos móbiles.