BBVA Momentum elixe á galega Activiza para impulsar o seu chimpo TIC
mércores, 7 de xuño do 2017
Hai
presenza galega na edición 2017 (a sexta) de BBVA
Momentum, unha iniciativa da entidade financeira para impulsar o
emprendemento e a innovación social. Nela están a participar
arestora un total de 86 emprendedores de cinco países (elixidos de
entre máis de 700 candidaturas procedentes de España, México,
Estados Unidos, Colombia e Turquía). Delas, unha vintena son do
ámbito estatal, incluída a firma innovadora Activiza,
de Pontevedra. Creada en 2013, Activiza é unha spin-off de
Saraiva Senior, empresa que resultou finalista na terceira edición
de Momentum Project. Entre os obxectivos de Activiza estará o de pór
en xogo iniciativas TIC para traballar a prol do envellecemento
saudábel.
Máis
polo miúdo, adícase a proxectos de innovación social no ámbito da
consultoría, a formación e o acompañamento a profesionais e
organizacións, sobre todo no sector da terceira idade. Acerca das
posibilidades que se lles abren con Momentum, os responsábeis de
Activiza sinalaron que se trata da “plataforma ideal para o
lanzamento do noso primeiro desenvolvemento TIC”. Esta nova
estratexia tecnolóxico-dixital engádese á súa experiencia previa
off-line en materia de propostas e metodoloxías para mellorar
a calidade de vida dos nosos maiores. O seu chimpo definitivo ao eido
dixital apoiarase, polo tanto, na súa concorrencia en Momentum.
“Precisamos axudala para facelo ben”, sinalan.
Volvendo
ao certame de BBVA, sinalar que as empresas foron seleccionadas baixo
un denominador común: o seu alto impacto social e o seu compromiso
co sustentábel. A maioría (40%) desenvolven a súa actividade no
ámbito da exclusión social e a educación; outro 18% actúa na
mellora do medio ambiente; un 15% adícase a solucións dixitais; e
outro 15%, a iniciativas vencelladas á saúde. O resto opera “en
diferentes sectores de actividade”.
Os
emprendedores seleccionados reciben unha completa formación en liña
e presencial: comezou en xuño e durará sete meses. Amais, terán
un acompañamento estratéxico a cargo dos mentores do programa, que
lles apoiarán no deseño do seu plan de crecemento. Por outra banda,
recibirán o asesoramento de especialistas en distintas disciplinas.
A idea da organización é que o programa BBVA Momentum sirva tamén
“de ponte entre os emprendedores e aqueles investidores que estean
interesados
en financiar os seus proxectos”.